હિંગ ! –સ્વ. નરહરિભાઈ ભટ્ટ.
હિંગ અહો, રસોડાની રાણી !
તીખી સુગંધે છમકારાતાં દાળ-શાક
મોંમાં તત્કાળ લાવે પાણી !…હિંગ અહો.
કોઈ કરે ભાભીના હાથનાં વખાણ,
કોઈ માતાના અનુભવી હાથની કમાલ;
આ તો દીયરજી લાવ્યા એ હીંગની ધમાલ,
એને આંગળાં ચાટીને વખાણી !…હિંગ અહો.
ભોજનને સ્વાદીષ્ટ-સુગંધી બનાવે;
બાજુના ઘરમાંયે જાણ કરી આવે !
નાકને સુગંધ,સ્વાદ જીભને લલચાવે,
એનું વર્ણન ના કરી શકે વાણી !…હિંગ અહો.
રુચિને જગાડતી ને ભૂખને લગાડતી,
પાચનમાં સાથ શો અપાવતી !
આંતરડે જામેલા મળોને ભગાડતી-
ભેદનશક્તિ મેં એની જાણી !!…હીંગ અહો.
ગોળો ને ગૅસ એ તો ક્ષણમાં શમાવતી,
આફરો ને શ્વાસને દમાવતી;
હેડકી, બગાસાંને બળથી હંફાવતી,
બંધ વાળતી એનો તાણી !…હીંગ અહો.
મોંઘા વઘારથી ભોજન શણગારતી,
પાચનક્ષમ એને બનાવી મલકાવતી;
ના એ રસોડાને, ઘરનેયે તારતી-
રાણી મસાલાની શાણી !!
आयु–डायजेस्ट 